Kryeministri Edi Rama tha mbrëmjen e sotme në “Real Story” se çështja e fotos 80 mijë dollarëshe është hetuar dhe gjykuar në SHBA, dhe nëse do të kishte lidhje me çështjen atëherë ai do të duhej të ishte pyetur dhe hetuar nga drejtësia amerikane.
Rama tha se kjo çështje është rikthyer në qendër të vëmendjes për të bërë paralelizma me një tjetër çështje, që ka të bëjë me financimet ku është përfshirë PD me një kompani lobimi në SHBA, që po hetohet nga prokuroria.
“Unë nuk kam asnjë lidhje me asnjë pagesë për asnjë arsye në botë”, tha Rama.
Lidhur me deklaratat e PD-së se prokuroria duhet të hetojë lidhur me foton 80 mijë dollarëshe, Rama tha se nuk ka asnjë ngjashmëri mes dy rasteve, shumën prej qindra mijëra eurosh që janë paguar nga PD dhe nuk u dihet burimi, dhe çështjes në fjalë.
“S’kam asnjë problem me asnjë lloj hetimi se s’kam asnjë lidhje me çështjen në fjalë”, tha Rama.
Lidhur me etiketimin si “gruaja e Bilalit”, Rama tha se kjo është një gjuhë e shthurur, nga ata që duhet të japing një shembull se si përdoret gjuha dhe duhet të përfaqësojnë njerëzit që i kanë zgjedhur.
