Një lajm i trishtë ka tronditur botën e futbollit, në veçanti atë italiane. Është ndarë nga jeta ditën e sotme, presidenti i Sasuolos, Xhorxhio Skuinci. 76-vjeçari luftoi gjatë kundër një sëmundje të rëndë, ndërkohë që ditën e sotme ndërroi jetë.
Skuinci arriti të shkruante historinë me klubin e Sasuolos, teksa nga një klub amator, arriti ta ngjiste në Serinë A, duke prodhuar mjaft talente. Ai ishte njëkohësisht edhe administratori i vetëm i Mapei, që është dhe sponsor i klubit të Serisë A.
Fillimisht 76-vjeçari mësohet se ka qenë një tifoz i zjarrtë i Milanit, ndërkohë që në vitet 2000 vendosi të merrte në administrim Sasuolon.
Klubi asokohe gjendej në kategoritë amatore në Itali, më saktësisht në C2. Në vitin 2006 skuadra u ngjit në C1, ndërsa dy vite më vonë preku Serinë B. Në vitin 2013 erdhi edhe ngjitja historike në elitën e futbollit italian, Serinë A. /Panoramasport/
