Pas votimit të Reformës në Drejtësi, kryetari i PD-së, Lulzim Basha e ka quajtur si një ogur i mirë për të ardhmen europiane të Shqipërisë miratimin me consensus.
“Paketa kushtetuese kaloi me votat e deputetëve të mazhorancës dhe të opozitës, ky është një ogur i mirë për bashkimin e shqiptarëve për drejtësinë e standardit evropian, për drejtësinë e aksesit të barabartë, dhe jo sipas kufirit të vendosur me të padrejtë nga politika. Çdo përgjegjësi merret vetëm kur shoqërohet me llogaridhënie. Kjo është një beteje që duhet të bashkonte shqiptarët më shumë se një vit më parë, por kjo betejë u imponua, pasi u konceptua si politike. Ata që nuk e deshën opozitën në këtë proces dhe që bënë gjithçka për damkosjen procesit. Ne ishim në këtë betejë në emër të çdo qytetari në opozitë dhe në qeveri”- tha Basha.
Ai ka rrëfyer edhe debatet me ambasadorët që sipas tij kanë qenë jo të pakta dhe të nxehta.
“Opozita luajti një rol qendror kundër kapjes së sistemit të drejtësisë. Reforma në drejtësi dhe vota e PD janë realitet, bazuar mbi një draft të aprovuar nga Komisioni i Venecias. Falënderoj ambasadorët Lu dhe Vlahutin, me të cilët debatet kanë qenë jo të pakta dhe të nxehta”- tha Basha.
