Avokatët e Jaeld Çela kanë apeluar vendimin e Gjykatës së Krimeve të Rënda për ish-kreun e Policisë së Vlorës. Çela u dënua me 3.4 burg, në seancën ku për ish-ministrin e Brendshëm Saimir Tahiri, gjykata dha dënimin me shërbim prove.
Ndonëse u dënua për të njëjtën vepër penale si Saimir Tahiri, “shpërdorim detyre”, Jaeld Çela, ish-drejtor i Policisë së Vlorës, nuk i shpëtoi burgut. Gjykata e Krimeve të Rënda ka vendosur dënimin me 3.4 vite burg ish-policin, i cili ndodhet ende në arrati.
Ndryshe nga Tahiri, që ky dënim iu konvertua në shërbim prove, për Jaeld Çelën nuk u aplikua e njëjta masë.
Ish-ministri dhe ish-kryepolici i Vlorës, sipas prokurorisë, bashkëpunonim me Habiljat në trafikun e drogës. Si Tahiri, edhe Çela u akuza për veprat penale “trafikim i narkotikëve” në bashkëpunim në formën e grupit të strukturuar kriminal, “kryerja e veprave penale nga organizata kriminale”, “grup i strukturuar kriminal”. Asnjë nga këto akuza nuk u pranua nga Gjykata, e cila e shpalli fajtor për “shpërdorim detyre”.
Edhe ish-ministri i Brendshëm, Saimir Tahiri, ashtu ciç ka paralajmëruar, pritet t’i drejtohet nesër, e enjte, Gjykatës së Apelit të Krimeve të Rënda, për të ankimuar vendimin e shkallës së parë ndaj tij.
