Gjermania nuk është në rolin e ndërmjetësit për krizën politike në Shqipëri.
Deklarata është bërë nga ambasadori gjerman Peter Zingraf gjatë një aktiviteti në kuadër të “Tetorit Gjerman”.
Zingraf ka deklaruar se zgjidhja për konfliktet politike duhet të vijë nga partitë politike, nga institucionet shqiptare. Sipas tij pjesëmarrja në tryezën e Reformës Zgjedhore të shumë partive politike ishte sinjal pozitiv.
Duke komentuar 9 kushtet e vendosura nga Bundestagu për çeljen e negociatave, Zingraf tha se disa nga kushtet duhet të plotësohen në hapin e parë, dhe të tjerat në fazën e dytë.
“Debati në Bundestag ishte i thellë dhe serioz, kjo ashtu siç është shprehur dhe një gazetar gjerman është një dëshmi qe Shqipëria do të pranohet në BE.
Në të vërtetë Bundestagu ka formuluar disa kushte qe duhet të plotësohen në një hap të parë dhe më pas në një fazë të dytë duhet të plotësohen kushtet e tjera.
Është e rëndësishme që të theksojmë tani po pritet se çfarë vendimi do të marrin dhe vendet e tjera të BE.
Kushtet që u formulën ishin artikuluar prej kohesh para këtij vendimi”, theksoi diplomati gjerman.
