Nga Boldnews.al
Maja Koçijançiç, zëdhënësja aktuale e shefes për Politikën e Jashtme në BE, ka reaguar ndaj propozimit të opozitës së bashkuar në Tiranë, lidhur me ngritjen e një komisioni të posaçëm, me prani ndërkombëtare për reformën zgjedhore.
Koçijançiç është shprehur se nuk i takon BE-së që të përcaktojë ose të bëjë komente mbi strukturën që duhet të përdoret për të lehtësuar konsultimet dhe më tej reformën zgjedhore.
“BE rithekson nevojën që të gjithë aktorët politikë të demonstrojnë gatishmëri të vërtetë për të kontribuar, përmes dialogut konstruktiv dhe të avancojnë punën për reformën zgjedhore”, tha ajo.
Deklarata e Koçijançiç është interpretuar në Tiranë nga mediat, kryesisht proqeveritare, si një refuzim që i bëhet propozimit të PD për ngritjen e komisionit me 1 përfaqësues nga Parlamenti, një nga opozita e bashkuar, dhe me prezencë ndërkombëtare.
Propozimi i PD-së, i artikuluar në tryezën e thirrur nga OSBE kaloi në heshtje nga socialistët, por shqetësoi “opozitën e re”, e cila dhuroi një shfaqje duke braktisur tryezën për dy orë dhe u rikthyen më pas pa dhënë shpjegime.
Por duket se për të qetësuar një grup deputetësh që nuk dihet se çfarë dhe kë përfaqësojnë, ka menduar një prej Zëdhënësve në detyrë të BE-së.
Ashtu si edhe më parë këtë rol e ka marrë Koçijançiç, që çuditërisht reagon gjithmonë në favor të atyre që konsiderohen si kundërshtarë të opozitës në Shqipëri, por jo vetëm.
Madje, zëdhënëset e Qeverisë në Tiranë apo Rilindjes, në situate të caktuara dalin shumë më të moderuara në qëndrime dhe deklarata se edhe vetë Koçijançiç.
Për të kuptuar qëndrimin e saj, mjafton të kërkosh në “google” reagimet që ka bërë në situata të ndryshme.
Kështu Koçijançiç një ditë pas votimeve të 30 qershorit thotë se zgjedhjet ishin të rregullta dhe të qeta, një vlerësim që se gjen as në raportin paraprak dhe atë përfundimtar të OSBE/ODIHR, por as edhe në çdo reagim tjetër ndërkombëtar.
E njëjta burokrate në Bruksel që godet opozitën në Shqipëri, nuk ka pasur guximin që të komentojë veprimet e opozitës bullgare, të ngjashme me ato të ndërmarra në Tiranë.
Po kështu, vështirë se mund të gjesh një deklaratë të Majas për kanabizimin e vendit, edhe atëherë kur BE nisi të pranojë dhe të shprehet e shqetësuar. Madje Koçijançiç në deklarimet e saj e trajtonte çështjen e kanabizimit si diçka të vogël, që BE po punonte me Tiranën zyrtare për t´a luftuar.
Po kështu Maja ka nxituar të reagojë edhe ndaj dekretit të Presidentit për anullimin e zgjedhjeve të 30 qershorit, me një qëndrim pothuajse të njëjtë me atë të Rilindjes, duke marrë përsipër të interpretojë një dekret presidencial, që sikundër thuhet në raportin e ODIHR, një kompetencë të tillë e ka vetëm Gjykata Kushtetuese.
Zëdhënësja e Mogherinit nuk do të ndalej vetëm me situatën në Tiranë, duke mbajtur një qëndrim të hapur kundër opozitës.
Në çështjen e dialogut mes Serbisë dhe Kosovës, ajo deklaronte se Trepça duhej të ishte pjesë e dialogut mes Prishtinës dhe Beogradit, deklaratë kjo që u konsiderua nga Ramush Haradinaj, Kryeministri i Kosovës, si cënim i sovranitetit.
Referuar çdo deklarate të Koçijançiç, të cilat në fakt mund të konsiderohen edhe si shërbimet e rradhës, është e vështirë që edhe reagimi i saj i fundit mbi propozimin e opozitës së bashkuar të merret seriozisht.
Thjesht duket se ato përdoren për konsumin e brendshëm politik, qetësojnë një palë që ndodhet krejt rastësisht në Kuvend dhe trajtohen si mbështetje për një mazhorancë, që është kapur mat nga Bundestagu.
Maja edhe këtë herë nuk zhgënjeu.
