Kryetari i PD-së, Lulzim Basha ka uruar Sebastian Kurz për fitoren e zgjedhjeve në Austri.
“Mbrëmë i përcolla urimet më të përzemërta mikut tim Kancelarit Sebastian Kurz dhe simotrës tonë Partisë Popullore të Austrisë për fitoren e thellë të zgjedhjeve të parakohshme parlamentare në Austri. Vendimi i liderit të ÖVP, Sebastian Kurz, ku ndonëse pa asnjë përgjegjësi personale apo politike, vendosi t’i rikthejë mandatin qytetarëve pas akuzave ndaj partnerëve të tij në qeveri për “pazare” për vota, është shembull kurajo dhe moraliteti qytetar dhe politik. Me votimin e djeshëm qytetarët austriakë dhanë një mbështetje të jashtëzakonshme për këtë vendim të Sebastian Kurz dhe Partisë Popullore Austriake, të cilët janë aleatë të paçmueshëm të Shqipërisë dhe model për politikën shqiptare”, shkruan Basha në një postim në Facebook.
Kancelari Sebastian Kurz dha dorëheqjen dhe thirri zgjedhjet e parakohshme pasi në një videopërgjim shfaqej zëvendëskancelari në një aferë të dyshimtë korrupsioni të mbetur në tentativë me një femër e cila pretendonte se ishte mbesa e një oligarku rus. Në zgjedhjet e reja, Kurz fitoi sërish shumicën qeverisëse.
