Një burrë 29 vjeç në fshatin Rragam të Shkodrës e ka rrahur nusen e tij sa ka mundur, aq sa dhuna e tij u pa fshati që thirri me urgjencë Policinë.
Në momentin kur 29-vjeçari, Zef Çobaj, i kishte drejtuar edhe kallashnikovin gruas se tij, mbërriti Policia. Çuditërisht, “trimi” që e kishte dërrmuar të shoqen dhe po matej ta vriste, e hodhi përtej armën dhe ia mbathi vrapit në drejtim të pyllit për t’u fshehur. Policia e ka ndjekur nga pas nëpër pyll për disa orë ikanakun dhe pasi e ka gjetur, i ka vënë prangat. Z.Ç do të akuzohet për tre veprat penale “Kanosje”, “Dhunë në familje” dhe “Mbajtja pa leje e armëve luftarake dhe e municionit”.
Dosja e tij i kaloi Prokurorisë së Rrethit Gjyqësor Shkodër.
Njoftimi i Policisë
Policia parandalon një ngjarje të rëndë kriminale në familje. Kanos me armë dhe dhunon fizikisht bashkëshorten, arrestohet në flagrancë nga Policia.
Sekuestrohet në cilësinë e provës materiale një armë zjarri kallashnikov pa leje. Specialistët për parandalimin dhe Hetimin e Krimeve në Komisariatin e Policisë Shkodër arrestuan shtetasin:
– Z. Ç., 29 vjeç, banues në fshatin Rragam/Shkodër.
Shërbimet e Policisë Shkodër, pas marrjes së njoftimit se në fshatin Rragam, Shkodër një shtetas po kanoste me armë zjarri dhe po dhunonte fizikisht në banesë bashkëshorten, kanë shkuar menjëherë në adresën e dhënë. Shtetasi Z. Ç., kur ka parë shërbimet e Policisë, ka lënë armën e zjarrit në banesë dhe është larguar në drejtim të pyllit, por është kapur pas disa orë ndjekjesh nga shërbimet e Policisë.
Në cilësinë e provës materiale u sekuestrua arma e zjarrit kallashnikov dhe në përfundim të veprimeve të para hetimore u bë arrestimi i shtetasit Z. Ç., për veprat penale “Kanosje”, “Dhunë në familje” dhe “Mbajtja pa leje e armëve luftarake dhe e municionit”.
Materialet procedurale i kaluan për veprime të mëtejshme Prokurorisë së Rrethit Gjyqësor Shkodër.
