Artikulli i botuar ditën e sotme nga Monitor lidhur me largimet masive nga Shqipëria, ku dominojnë të rinjtë ka ngritur alarmin për një shpopullim të mundshëm të Shqipërisë, një fenomen ky që s’mund të kalonte pa u vënë re nga Presidenti i vendit, Ilir Meta.
“Ndalimi i shpopullimit të Shqipërisë, sfida më e madhe që kërkon reflektim urgjent”. Me këtë deklaratë e ka nisur ditën sot presidenti i vendit Ilir Meta pas publikimit të lajmit, 285 mijë shqiptarë planifikojnë të ikin nga vendi në vitet në vijim.
Në shkrimin e Monitor theksohet se 285 mijë shqiptarë planifikojnë të ikin nga vendi në vitet në vijim, shumica prej të cilëve janë të rinj.
“26 për qind kanë pohuar se dëshirojnë të emigrojnë në Gjermani, 18 për qind në Britani , 16% në Itali dhe pjesa tjetër në vende të tjera. Si numër, shqiptarët janë të dytët që duan të ikin, pas rumunëve (358 mijë), por në raport me totalin e të rinjve që duan të emigrojmë zëmë rekord, me 40% të të rinjve që preferojnë të largohen nga vendi (shih grafikun).”, thuhet në shkrim.
