Ambasadori gjerman në Tiranë, Peter Zingraf ka konfirmuar në një prononcim për mediat se Gjermania voton hapjen e Negociatave të Shqipërisë me BE me kushte.
Zingraf ka sqaruar kështu në mënyrë zyrtare opinionin publik duke e bërë të qartë se janë 9 kushte që Gjermania i ka vendosur qeverisë për hapjen e Negociatave.
Ambasadori i Gjermanisë në Shqipëri shprehet se u takon partive politike në vend që të zgjidhin krizën politike 7 mujore.
Zingraf lë të kuptohet se ata nuk e kanë pritur mirë refuzimin që u bëri kryeministri Edi Rama deputetëve të Bundestagut në fillim të muajit qershor për të negociuar me palët, duke u thënë: “Mos ejani kot”.
“Gjetja e një kompromisi u mbetet aktualisht institucioneve shqiptare. Nuk është detyrimi ynë. Kam parë se hapi i parë u realizua dje për tu ulur së bashku pozitë – opozitë. Vlerësoj faktin se edhe opozita jashtë parlamentit dërgoi për herë të parë përfaqësuesit e saj në tryezën e reformës zgjedhore. Mendoj se institucionet dhe partitë politike shqiptare do ta gjejnë një zgjidhje. Drita përfundimtare për Shqipërinë varet tashmë nga shtetet e tjera anëtare të Bashkimit Europian. Ne si Gjermani kemi vendosur një ‘Po’ me kushte në rastin e negociatave me Shqipërinë, por duhet të presim për shtetet e tjera anëtare”, u shpreh ai për Klan plus.
