Pas dakortësimit të palëve në frymën e konsensusit të prezantuar sot paradite nga Komisioneri Hahn, kryetari i Kuvendit, Ilir Meta i ka kërkuar grupit të negociatorëve të reformës në drejtësi të mblidhen brenda ditës së sotme për të përfunduar draftin hibrid.
“Kryetari Kuvendit Ilir Meta kërkon nga grupi negociator i mandatuar nga takimi i dites se hene qe te rimblidhet sa me pare, brenda dites se sotme, per te finalizuar detajet perfundimtare te daftit hibrid, pas dakortesimit te paleve ne frymen e konsensusit te prezantuar sot paradite nga Komisioneri Hahn”, thuhet në njoftimin për mediat nga Kuvendi.
Komisioneri për Zgjerimin në Komisionin Europian, Johannes Hahn i dërgoi sot një letër krerëve të partive kryesore të përfshira në negociata ku vinte theksin te roli që do të ketë Operacioni Ndërkombëtar i Monitorimit. Pas kësaj letre, lideri i opozitës dha lajmin e mirë se ishte arritur konsensusi për miratimin të enjten reformën në drejtësi.
