Interi vjen në provimin e radhës të Serie A. Përballë do të ketë Lazion, nga ora 21:00 e mbrëmjes së sotme, në “San Siro”. Zikaltrit do të duhet t’i përgjigjet Juventusit, që mundi Brescia në transfertë, duke e parë veten në krye të renditjes, të paktën për një natë. Për Handanoviç me shokë, vazhdimësia pozitive, pas suksesit bindës në derbin me Milanin, do të ishte mjaft domethënës. Madje, fitorja e pestë radhazi në kampionat, do të barazonte rekordin e Interit të sezonit 2015-2016 në këtë drejtim, kur në stol drejtonte Roberto Mancini.
Conte duket se i ka larguar dyshimet e formacionit. Siç raportohet nga “La Gazzetta dello Sport”, në sulm do të ketë vend për Politano, në krah të Romelu Lukaku. Kjo nënkupton se Lautaro Martinez dhe Sanchez do ta nisin gjithçka nga pankina. Ndryshime priten edhe në mesfushë, aty ku do të jetë radha e Vecino në vend të Barella. Biraghi është një kandidat për fanellë titullari, por sipas gjasave, Asamoah duket favorit në të majtë. Asnjë risi në mbrojtje: Godin konfirmohet bashkë me De Vrij dhe Skriniar.
Për Romelu Lukaku do të jetë momenti i duhur që të “përputhet” me dy kampionë të mëdhenj të historisë së Interit, Ronaldo dhe Milito. Në rast se belgu shënon sonte, ai do të hynte në histori. Me katër gola në pesë ndeshjet e para të kampionatit, Lukaku do të barazohej me brazilianin e madh (1997-1998) dhe argjentinasin e famshëm të “tripletës” (2009-2010). Me një dopietë, ai do t’i barazonte ata edhe për numrin e golave të shënuar (pesë).
Ja formacionet e mundshme:
INTER (3-5-2): Handanovic; Godin, De Vrij, Skriniar; Candreva, Vecino, Brozovic, Sensi, Asamoah; Politano, R. Lukaku.
LAZIO (3-5-2): Strakosha; Luiz Felipe, Acerbi, Bastos; Lazzari, Milinkovic-Savic, Leiva, Luis Alberto, Lulic; Immobile, Correa.
