Opozita e bashkuar do të përfaqësohet në tryezën e thirrur nga OSBE për reformën zgjedhore në nivel ekspertësh.
Është ky vendimi i marrë nga drejtuesit e partive opozitare gjatë një takimi të zhvilluar në selinë e PD-së me kreun demokrat Lulzim Basha.
Vendimi erdhi pak ditë pas ftesës së prezencës së OSBE.
Ndërkohë pas takimit, kryetarja e LSI-së, deklaroi se problem për zgjidhjen e krizës nuk qëndron te opozita por te Kryeministri Edi Rama.
Monika Kryemadhi tha se opozita është e gatshme për një takim institucional, duke shtuar se ajo do të propozojë edhe një paketë anti-krizë.
“Kemi vendosur që të përfaqësohemi me ekspertë, dhe do të mbajmë qëndrimin tonë në këtë tryezë. Sa i përket krizës, problemi ka qenë kryeministri për zgjidhjen e saj, opozita ka qenë për institucionalizimin e dialogut, kemi qenë të gatshëm edhe për të dhënë votat për reformën në drejtësi.
Opozita ka qenë gjithnjë e gatshme, jo për të zgjidhur krizën personale, por për të ecur para dhe për të hapur me urgjencë negociatat me BE, dhe ne po vazhdojmë punën me të gjithë aleatët për përgatitjen e paketës antikrizë.
Është paketë për t’u dhënë shqiptarëve më shumë mundësi”, tha kryetarja e LSI.
Takimi i Bashës me kryetarët e partive opozitare, i parapriu një tjetër takimit të kreut demokrat me Ambasadorët e BE-së dhe OSBE-së në Tiranë, përkatësisht Luigi Soreca dhe Bernd Borchardt.
OSBE kishte thirrur të gjitha partitë në një tryezë për reformën zgjedhore, pas publikimit të raportit të vëzhguesve ndërkombëtarë mbi votimet e 30 qershorit.
