Me urdhër të Kryeministrit Edi Rama, efektivë të Forcave të Armatosura, u angazhuan në montimin e disa çadrave në stadiumin e qytetit të Durrësit.
Banorët e qytetit bregdetar kanë ndjerë më tepër frikën dhe panikun e tërmeteve që përfshinë vendin ditën e djeshme dhe gjatë paradites së sotme, pasi epiqendra e tyre ishte pikërisht në Durrës.
Gjatë natës mes të shtunës dhe të dielës banorët qëndruan jashtë, në lulishte apo sheshpushimet mes pallatave nga frika se lëkundje të tjera mund të ndodhnin.
Ditën e djeshme, banorëve të qytetit nuk iu afrua asnjë ndihmë, madje as u lanë të hyjnë në mjediset e stadiumit, derisa vetë Kryeministri Edi Rama, sikundër pohoi sot, u angazhua për ndriçimin dhe hapjen e dyerve të stadiumit.
Sot kur situata është më e qetë dhe lëkundjet e regjistruara kanë një magnitudë të vogël, strukturat janë angazhuar dhe po marrin masat.
Duket se shprehja më mirë vonë se kurrë ka gjetur zbatim nga qeveria në rastin e tërmetit të fundit që goditi Durrësin, Tiranën, por edhe shumë zona të tjera në Shqipërinë e mesme.
