Kryeministri Edi Rama u shfaq brenda 1 ore në dy takime, i pari me Shtabin e Emergjencave dhe tjetri me kryebashkiakët e PS-së dhe deputetët, ku përsëriti të njëjtat gjëra.
Duket se kjo nuk i ka pëlqyer deputetit të Shkodrës Paulin Sterkaj, i cili kërkoi që t’i jepej fund propogandës me deputetë e politikanë, dhe vëmendja të përqëndrohej te specialistët e fushës.
“Kjo kaloi, por të mendojmë për të ardhmen. Para 30 viteve ndodhi në Shkodër, e kam përjetuar unë. Kishte të plagosur, por nuk kishte krevate ku me i shtruar. Duhet të veprojë çdo qeveri. Ministrat përkatës duhet të gjejnë specialistët e duhur, nuk duhet të bëjnë një propagandë.
Çdo fëmijë sot është i plagosur psikologjikisht nga tmerri dhe paniku. Më mirë do ishte një solidaritet me specialistët e fushës, se sa me propagandën e deputetëve. Duke filluar nga deputetët të lëmë një kontribut nga rroga, por edhe nga të ardhurat e taksave që merr shteti, të ndahet një fond special”, tha Sterkaj.
Kryeministri Rama duke iu përgjigjur deputetit tha se është e qartë që dje dhe sot e kemi shfrytëzuar maksimalisht aksesin në media, për të ndikuar në qetësimin psikologjik.
“Kontakti i drejtpërdrejtë është i pazëvendësueshëm, sepse afërsia dhe komunikimi janë të pazëvendësueshme. Fondi është gjithmonë në buxhet, fondi rezervë. Me këtë masë dëmesh, ne jemi krejtësisht të qetë nga pikëpamja e kapacitetit mbulues”, tha ai.
