Ish-ministri i Brendshëm, Saimir Tahiri ka folur në emisionin “Opinion” pas vendimit të dhënë nga Gjykata e Krimeve të Rënda në ngarkim të tij. Ashtu si në prononcimin për gazetaret, Tahiri tha se vendimi i gjykatës që e shpalli fajtor për shpërdorim detyre ishte absurd.
“Nuk kam gjë më shumë për të thënë se ajo çka thashë kur dola. Nesër do flas më shumë. Nesër do jem më i qetë”, deklaroi Tahiri në një lidhje telefonike me emisionin.
Jeni dënuar me 5 vite, mendoni se ka qenë një dënim politik?
“Kjo është qesharake dhe asburde në nivele të frikshme. Mos prit të jap mendim ndryshe. Tha meqë kam disa kushërinj, kam shpërdoruar detyrën. U hetova dy vjet për trafikant, por me thanë meqë ke ca kushërinj trafikant, shpërdorove detyrën”, u përgjigj ish-ministri i Brendshëm.
Drejtuesi i emisionit Blendi Fevziu e pyeti nëse deklaratat e tij më herët gjatë ditës së sotme ishin mesazhe të koduara për PS.
“E kam dëgjuar shpesh, jam aq burrë sa ta bëj drejtpërdrejtë, s’lodhem me mesazhe të koduara. Mos më fyeni më me këtë historinë e mesazheve të koduara”, u shpreh ish-ministri, i dënuar sot nga Gjykata e Krimeve të Rënda me 3.4 vite shërbim prove për shpërdorim detyre.
