Një fotografi e siguruar nga revista amerikane Time Magazine tregon se kryeministri i Kanadasë, Justin Trudeau, në një festë të shkollës, më 2001, e kishte lyer fytyrën me ngjyrë të zezë.
Temë e festës ishin “Netët arabe”. Duke iu adresuar fotografisë, Trudeau tha se i vjen “thellësisht keq”.
“E marr përgjegjësinë për vendimin tim. Nuk është dashur ta bëj. Nuk kam menduar se është raciste në atë kohë, por tani e kuptoj se është dhe më vjen keq”, tha Trudeau.
Kryeministri Trudeau po “lufton” për rizgjedhje më 21 tetor.
Rivali i tij, Andrew Scheer, udhëheqës i Partisë Konservatore, tha se Trudeau nuk është i përshtatshëm për të qeverisur vendin.
“Lyerja e fytyrës me të zezë është një akt i talljes dhe racizmit”, tha Scheer.
Këshilli Kombëtar i Myslimanëve Kanadezë e kritikoi po ashtu Trudeaun për fotografinë, duke thënë se ajo “i bën jehonë historisë së racizmit”./REL
