Nga Boldnews.al
Koncesioni i sterilizimit të sallave të operacioneve dhe pajisjeve kirirgjikale po kthehet në makutërinë e vjedhjes me ligj. Për vitin 2018 i janë dhënë kompanisë private 3.6 milionë euro, rreth 30% më shumë se vlera e planifikuar në buxhet. Për të ulur kostot e këtij konçesioni i cili që në nisje mbante erë aferë, qeveria Rama ka urdhëruar që të ulet numri i operacioneve, duke nisur nga synetllëku… Po, kjo është mëse e vërtetë për shkak të kostove të larta që i duhen derdhur në arkën e kompanisë private.
Në QSUT ka shpërthyer një debat i madh mes drejtuesve të institucionit dhe pavioneve të kirurgjisë. Këtyre të fundit u është kërkuar që të shmangin sa më shumë operacionet për rastet që presin.
Ndër “masat” e para të marra janë ndalimi i menjëhershëm i synetllëqeve tek kirurgjia e fëmijëve por edhe të rriturve. Sado qesharake të duket kjo është mënyra që qeverisja Rama po kursen…
Para viteve 90′ synetllëqet ishin të ndaluara dhe nëpër spitale nuk kryhej asnjë ndërhyrje e tillë, ai u kthye në biznes fitimprurës nga berberët…
E sot koha kthehet pas, konçesioni i sterilizimit të pajisjeve kirurgjikale thjesht po jep efektin e pritshëm: gllavërim dhe makutëri me paratë publike. Vetë konçesioni i dhënë në vitin 2016 kur ministër i Shëndetësisë ishte Ilir Beqja, u konsiderua nga ekspertët si dukshëm korruptiv.
Atë e fitoi një kompani e ngritur nga një emigrant shqiptar i profilizuar në fushën e ndërtimit, si rikonstruksione të vogla shtëpishë banimi, pra nga një grup ustallarësh… Mjeshtrat e vërtetë në fakt ishin e janë në Shqipëri, Rama dhe Beqja.
Kryeministri për të mbrojtur këtë konçesion abuziv bridhte nëpër studiot televizive me bisturi e gërshërë të vjetra dhe ulërinte duke parë kamerat: ja, me këto pajisje bëheshin operacionet. Po sa kushton sterilizimi vetëm për një operacion? Është e rëndë shifra…
Ndahen me tre kategori, ku për një ndërhyrje me intensitet të lartë paguhen 37 700 lekë të reja, për ndërhyrje të mësme 22 300 lekë dhe të ulët 13 900.
Tarifave tepër të larta, pa asnjë llogjikë shpenzim-fitim i shtohet edhe makutëria e një pjese të konsiderueshme të mjekëve. Ata kanë shtuar dukshëm numrin e operacioneve, ku edhe për rastet kur klinikisht nuk ka nevojë, “pacientë-klientët” futen në salla operacioni. Qëllimi dihet: një shuk para në xhepin e mjejëve.
Është planifikuar që kompania të marrë rreth 90 milionë euro për një periudhë 10-vjeçare. Gjithsesi me këtë ritëm Rama pavarësisht se ka hequr synetllëqet, do i duhet ta kapërcejë disa herë shifrën 90 milionë euro. Dy kokat e këtij projekti ishin Rama dhe Beqja, që nga këtu duhet nisur synetllëku.