Partia Demokratike dhe aleatët e saj pritet të vendosin gjatë javës nisjen e protestave kombëtare kundër Kryeministrit Edi Rama.
Burime zyrtare nga PD bëjnë të ditur se do të jetë tryeza e partive të opozitës e cila do të përcaktojë axhendën, por edhe strategjinë që do të ndiqet për përmbushjen e misionit, largimin e Edi Ramës nga posti i Kryeministrit, krijimin e një qeverie tranzitore dhe zgjedhjet e parakohshme parlamentare dhe ato lokale.
Mësohet se brenda javës, partitë e opozitës do të mblidhen për të përcaktuar një datë për nisjen e protestave, të cilat duket se do të jenë të koordinuara me aksione të tjera opozitare, që nga platform për nxjerrjen e vendit nga kriza, ajo për drejtësinë, dhe deri te ajo për biznesin e vogël dhe të mesëm.
Burimet theksojnë se strategjia opozitare do të përfshijë takimet derë më derë me qytetarët, të cilët do të sqarohen mbi platformat, që do të garantojnë zgjidhjen afatgjatë të krizës.
Ndërkohë, Sekretari i Përgjithshëm i Partisë Demokratike, Gazment Bardhi, në emisionin “5 pyetje nga Babaramo”, deklaroi se këtë javë do të mblidhen strukturat e PD-së dhe aleatët, që do të vendosin datë konkrete për protestat, por theksoi se kjo nuk do të jetë mënyra e vetme që kjo forcë politike do të përdorë për të arritur qëllimin final.
Duke u ndalur në tre çështje kryesore, Bardhi tha sse nuk ka një marrëveshje të fshehtë PD-PS, nuk ka përçarje me aleatët e aq më tepër me LSI-në, si dhe kryebashkiakët Valdrin Pjetri (Shkodër), Agim Kajmaku (Vorë) dhe Mark Babani (Vau i Dejës) nuk janë të vetmit, për të cilët kanë marrë informacione dhe kanë siguruar dokumentet që vërtetojnë se janë me të shkuar kriminale. Ai paralajmëroi se kanë informacione edhe për 7-8 kryebashkiakë të tjerë, që janë me precedentë penal.
