Presidenti amerikan Donald Trump deklaroi këtë të shtunë se djali i Osama bin Laden, Hamza u vra gjatë një operacioni ushtarak amerikan kundër terrorizmit.
“Hamza Bin Laden, anëtari i nivelit të lartë të Al-Kaedës dhe djali i Osama Bin Laden, u vra në një operacion kundër terrorizmit të Shteteve të Bashkuara në rajonin Afganistan / Pakistan,” thuhet në një deklaratë nga zyra e Trump dërguar gazetarëve.
Vdekja e Hamzës e ka privuar Al-Kaedën nga “aftësitë e tij të rëndësishme drejtuese dhe lidhja simbolike me babanë e tij”. Brenda Al-Kaedës, djali i Bin Laden ishte “përgjegjës për planifikimin dhe marrëdhëniet me grupe të ndryshme terroriste”, thuhet në deklaratë.
Edhe në muajin në korrik, u raportua vdekja e Hamza Bin Ladenit në një sulm ajror. Në atë kohë, Trump tha se Hamza ishte “shumë kërcënues” për SHBA, por nuk pranoi të jepte detaje të mëtejshme.
Edhe pse këtë herë u konfirmua zyrtarisht nga SHBA vdekja së Hamza, mbeten ende të paqarta detajet dhe koha e operacionit.
I ati i Hamza, Osama bin Laden, ish-udhëheqësi i rrjetit terrorist të Al Qaedas, u vra në një operacion të forcave amerikane në Pakistan në vitin 2011. Osama Bin Laden u cilësua truri i sulmeve të 11 Shtatorit 2001 në Shtetet e Bashkuara. Edhe i biri i Osamas, Hamza ka ndjekur gjurmët e të atit, duke vijuar rrugën e terorizmit.
