Një 44-vjeçar është vënë në pranga nga policia në Tiranë pasi ka plagosur me mjet prerës punëtorin që po i kryente punime në banesë. Ky i fundit është transportuar në spital dhe mësohet se ndodhet në gjendje të rëndë, ndërsa ngjarja, sipas policisë, ka ndodhur për motive të dobëta.
Shërbimet e Policisë të Komisariatit Nr.4, arrestuan në flagrancë, shtetasin Stefan Agolli, 44 vjeç, banues në Tiranë, i dënuar më parë për vjedhje.
Sipas një rindërtimi paraprak të ngjarjes, në një banesë në rrugën “Myslym Keta” në zonën e Kinostudios, pronari i saj ka goditur me mjet prerës për motive të dobëta shtetasin D.L., 51 vjeç i cili ka qenë duke kryer punime aty. I dëmtuari D.L., aktualisht ndodhet në spitalin e Traumës nën kujdesin mjekësor. “Materialet i kaluan për veprime të mëtejshme Prokurorisë së Rrethit Gjyqësor Tiranë për veprën penale ‘Plagosje e rëndë me dashje’, në ngarkim të shtetasit S.A.”, njoftoi policia.
Autori me precedent penal
Siç bëri me dije policia e Tiranës, autori është me precedentë penalë. Pesë vite më parë, ai është arrestuar për disa vjedhje në autobusë urbanë.
“Më datë 16.06.2014 rreth orës 23.00 nga Komisariati i Policisë Nr.4 Tiranë u krye arrestimi në flagrancë i shtetasit Stefan Seat Agolli, 37 vjec, banues në Tiranë, i dënuar më parë për vjedhje. Arestimi i tij u bë sepse më datë 16.06.2014, në orën 17.30, në rrugën ‘Bardhyl’ në autobuzin e linjës së Unazës, dyshohet se ka vjedhur protofolin, me një shumë prej 7200 lekë, një shtetaseje. Shtetasi Stefan Agolli është kapur menjëherë pas ngjarjes në kryqëzimin e ‘Brrylit’ në momentin që do të hidhte në lumin e Lanës sendet e vjedhura. Në cilësinë e provës materiale ju sekuestruan sendet e vjedhura. Nga puna e bërë dhe nga kontrolli i banesave të shtetasit Stefan Agolli, është bërë dokumentimi i 10 vjedhjeve të ndodhura si me poshtë:- Më datë 21.05.2014.- Më datë 03.02.2014.- Më datë 28.02.2014.- Më datë 17.04.2014, Më datë 03.06.2014, – Më datë 12.06.2014. Gjithashtu u bë dokumentimi i ngjarjeve të ndodhura në territorin e Komisariatit Nr.3:- Më datë 11.04.2014, në autobuzin e linjes së Unazës dyshohet se i ka vjedhur telefonin celularin një shtetaseje, Më datë 14.03.2014, – Më datë 18.03.2014, – Më datë 31.03.2014, – Më datë 15.04.2014”, njoftoi asokohe policia.
