Në një video që qarkullon në Tiktok, shfaqen ushtarë zviceranë që këndojnë me shumë përkushtim këngën “Xhamadani vija vija”, e cila konsiderohet himni jozyrtar i Shqipërisë së Madhe.
E përkthyer në gjermanisht, kënga thotë “si fijet e kësaj xhakete (Xhamadani), aq afër janë Kosova dhe Shqipëria. Oh sa e madhe është Shqipëria”, raporton 20minuten.ch.
Video është pëlqyer nga rreth 800 persona, megjithatë ajo ka shkaktuar reagime kundërshtuese për faktin se persona me uniformën e ushtrisë së Zvicrës këndojnë himne për shtetet e tjera.
Zëdhënësi i ushtrisë, Daniel Reist, thekson se rasti i incizimit nuk shqetëson shumë autoritetet, pasi është jo-formal dhe është marrë nga një “automjet i mbyllur udhëtimi”.
Sociologu ushtarak, Tibor Svircsev (ETH), i pyetur rreth rastit, ka thënë se ushtarakët me origjinë të huaj “kanë dy zemra në gjoksin e tyre”. Ata kërkojnë që të bëjnë simbiozën mes rrënjve të tyre kulturore dhe ushtrisë.
Por Svircsev thotë më tej se aksionet e tilla nuk janë të bukura, pasi mund të sjellin reagime nga minoritetet tjera – fjala vjen serbët – dhe më pas të zhbëjnë unitetin e ushtrisë helvete.
Sipas Szvircsev Tresch, nëse himni do të ishte kënduar në publik, kjo ndoshta mund të shoqërohej me pasoja disiplinore, si ato në pranverën e vitit 2015, kur ushtarët në publik pozonin me flamurin shqiptar.
