Në prag të zgjedhjeve, një përleshje fizike ka ndodhur mbrëmjen e djeshme në një studio televizive në Kosovë.
Bashkëshorti i ministres së Arsimit, Besa Shahini, Dardan Molliqaj i cili kandidon për deputet nga koalicioni PSD-AAK, është përleshur fizikisht me një kandidat për deputet të Vetëvendosjes, Haki Abazin.
Ngjarja ka ndodhur në mes të emisionit “Pressing” në kanalin T7. Dy kandidatët për deputet ishin pjesë e debatit televizi dhe në pushim të tij janë përleshur fizikisht me njëri tjetrin.
Fjalët e Haki Abazit për përleshjen: “Kam qenë duke dalur nga koridori i televizionit dhe Dardani me shoqëruesin e tij erdhën përmbrapa dhe u kacafytëm dhe dojshim me m`goditë. Ka hy Rexhep Hoti në mes dhe qashtu njëfarë situate e pakëndshme e kapjes për fyti e qisi senesh. Edhe një goditje në këmbë sdi ka më ka ardhë se ishte një situatë komplet jo e mirë”, kishte thënë Abazi.
Fjalët e Molliqajt për përleshjen: “Asgjë nuk ndodhi jashtë studios, përveç një debati me pak tensione që ishte vazhdimësi e debatit publik. Unë nuk i kam problem debatet televizive dhe ndjehem shumë komod t’i mbroj bindjet e mia. Nuk fshihem asnjëherë. Secilin veprim timin politik jam në gjendje ta arsyetoj deri në fund. Nuk e kam problem asnjë akuzë e sulm për veprimet e mia politike. Ankesa e vajtimet nuk mund t’i fshehin humbjet në nivel argumentesh nëpër debate televizive”, ka deklaruar Molliqaj pas incidentit.
Vetëvendosje e quan bandit bashkëshortin e Besa Shahinit, Dardan Molliqajn:
“Bandat mafioze që kanë kapur shtetin po frikësohen prej ndryshimit që po vjen, prej entuziazmit popullor dhe prej drejtësisë që do të vendoset nga Lëvizja VETËVENDOSJE! Ata po e shfaqin nervozën e tyre duke shpifur pa u ndalur, e tash edhe duke sulmuar fizikisht. Ata tashmë e kanë traditë sulmin fizik ndaj debatuesve në emisione televizivë”.
Ndërkohë që konfliktin fizik fillimisht e ka bërë të ditur moderatori i emisionit ku u shpreh:
I kam përshëndetur të gjithë mysafirët dhe jam bërë gati për ta nisur pjesën e dytë. Papritmas e kam dëgjuar një zhurmë të madhe në studio, jam kthyer dhe kam pare teksa përplasej për dysheme z. Haki Abazi. Kam dalë me nxitim në koridor dhe kam mundur ta shoh z. Dardan Molliqajn teksa hynte në lift dhe z. Rexhep Hotin qe ishte ne koridor. Nuk kam mundur të bisedoj me z. Molliqaj, as me z. Hoti. Nuk e kam parë situaten çfarë ka ndodhur pasi që isha në studio dhe ngjarja ka ndodhur jashtë saj.
