Ditën e djeshme, në Tiranë, zbarkoi një delegacion faktmbledhës i Komisionit të Venecias, i thirrur nga kryetari i Kuvendit Gramoz Ruçi, për çështjen e qëndrimeve kushtetuese apo antikushtetuese, të presidentit Ilir Meta.
Delegacioni pati një axhendë të ngjeshur me takime duke mos lënë jashtë asnjë nga palët në spektrin politik, por duke takuar edhe të gjithë krerët e shtetit. Pas këtij zhvillimi, opinioni publik është në pritje të opinionit të këtij komisioni, për të kthjelluar situatën konfliktuale mes mazhorancës dhe presidentit të vendit, veçanërisht me rastin e dekreteve për zgjedhjet e 30 qershorit.
Në një prononcim për gazetën “Shekulli”, Komisioni i Venecias ka zbardhur edhe kohën kur do të publikojë opinionin për këtë çështje duke deklaruar se: “Arsyeja e këtij delegacioni ka të bëjë me vetë kërkesën që ka bërë Kreu i Parlamentit të Shqipërisë në lidhje me rolin e Presidentit të Shqipërisë, Ilir Meta për të dekretuar një datë tjetër për zgjedhjet lokale. Gjithashtu Komisioni i Venecias thekson se janë duke e ndjekur nga afër situatën politike në Shqipëri, por duke qenë se ata janë vetëm një institucioni ligjor këshillues, nuk mund të prononcohen për ngjarjet e caktuara politike që ndodhin në Shqipëri. Draftin përfundimtar, Komisioni i Venecias do ta bëjë publike në muajin tetor”.
