Ish-ministrja e Mbrojtjes, Mimi Kodheli, pohoi sot se radarët kanë filluar në punojnë në dhjetor të 2013-ës.
Reagimi i Kodhelit ka ardhur pas deklaratave të ish-ministrit të Brendshëm, Sajmir Tahiri, i cili pohoi se ka njoftuar edhe kolegen e tij ministre, lidhur me mosfunksionimin e radarëve.
Madje Kodheli shkoi deri atje sa e cilësoi një goditje nën brez, akuzat lidhur me radarët.
Sipas saj, një grup i madh njerëzish monitorojnë ujrat detare. Kodheli tha se radarët nuk mund të fiken apo të jenë jashtë funksionit.
“Çështja Tahiri është një punë e drejtësisë. Ne shpresojmë që drejtësia të jetë e drejtë dhe ti shkohet deri në fund. Nuk kam asnjë koment lidhur me kërkesën e prokurorisë për dënimin e Tahirit me 12 vjet burg”, tha Kodheli.
Sipas saj, çështje të caktuara, përfshi edhe atë të Tahirit, nuk duhet të njollosin PS, e cila është e vendosur për t’i shkuar drejtësisë deri në fund.
Në seancën e sotme gjyqësore, Tahiri tha se “në cilësinë e ministrit, i jam drejtuar asokohe me shkresën e datës 29/10/2013, (shkresë sekrete) koleges time, ministres Kodheli, duke e informuar se nuk punon radarët”.
Sipas prokurorisë, trafikimi është kryer me një peshkarexhë me emrin ‘Fatima’.
“Prokuroria e lë të mjegullt faktin se asokohe janë fikur radarët. Por unë në cilësinë e ministrit, i jam drejtuar as kohe me shkresën e datës 29/10/2013, (shkresë sekrete) koleges time, ministres Kodheli, duke e informuar se nuk punon radarët”, tha ai.
Tahiri, së bashku me Jaeld Celën, ish-drejtor i Policisë së Vlorës, Sokol Boden, ish-oficer policie, dhe Gjergj Kohilën, ish-oficer policie, akuzohen për “trafikim i narkotikëve” në bashkëpunim në formën e grupit të strukturuar kriminal, “kryerja e veprave penale nga organizata kriminale”, “grup i strukturuar kriminal”.
