Në të njëjtën ditë që Presidenti Ilir Meta do të përballet me Komisionin Hetimor parlamentar që kërkon shkarkimin e tij, një delegacion nga Komisioni i Venecias do të zbarkojë në Tiranë me një agjendë dy ditore të ngjeshur.
Misioni i delegacionit të Komisionit të Venecias është të mbledhë fakte dhe për të kuptuar veprimet e Presidentit Meta për anulimin e mbajtjes së zgjedhjeve më 30 qershor.
Në kushtet kur Gjykata Kushtetuese është jashtë funksionit, Komisioni i Venecias do të përgatisë opinionin e tij lidhur me atë nëse Presidenti ka shkelur ose jo Kushtetutën, sikundër pretendohet nga mazhoranca e Kryeministrit Edi Rama.
Dekretet e Presidentit u rrëzuan nga KQZ, e cila i trajtoi si akte administrative, por në fakt ato kurrë nuk u çuan në gjykatë, p♪7rfshi këtu edhe atë administrative.
Komisioni ka publikuar në faqen zyrtare vizitën e pritshme të delegacionit që do të vizitojë Tiranën.
Ai thotë se delegacioni do të përgatisë opinion mbi fuqinë e Presidentit për përcaktimin e datës së zgjedhjeve, në një sistem parlamentar. Komisioni informon se delegacioni do të qëndrojë të hënën dhe të martën dhe do takohen me Presidentin, Kryeministrin, kryetarin e Kuvendit, drejtuesit e opozitës në Kuvend, anëtarët e Komisionit Hetimor për shkarkimin e Metës, ministrin e Brendshëm, përfaqësues të Komisionit Qendror të Zgjedhjeve dhe anëtaren e Gjykatës Kushtetuese, Vitore Tusha.
Gjithashtu konfirmohet se delegacioni i Venecias do të takohet të martën, në ditën e dytë të qëndrimit të delegacionit në Tiranë, në orën 8:00 të datës 10 shtator me Oerd Bylykbashin dhe Klajda Gjoshan.
Opinioni mbi këtë çështje është parashikuar të jepet në sesionin e tetorit të mbledhjes së Komisionit të Venecias.
Ngritja e Komisionit Hetimor u kërkua nga një grup prej 55 deputetësh socialistë, pasi kreu i shtetit anuloi zgjedhjet e 30 qershorit.
Kreu i shtetit është shprehur i gatshëm për t’u përballur në Komisionin Hetimor parlamentar, ku pritet të jetë i pranishëm në orën 10:00 të së hënës.
