Raporti i OSBE/ODIHR të lexohet në mënyrë të përgjegjshme. Kështu deklaroi ministri i Jashtëm në detyrë, Gent Cakaj, duke reaguar lidhur me raportin përfundimtar për votimet e 30 qershorit.
Cakaj tha se raporti nuk i cilëson zgjedhjet ilegjitime, ndërsa theksoi se ODIHR vlerëson procesin e numërimit të votave.
“Një udhërrëfyes për konsensus politik”, e cilësoi Cakaj raportin, duke shtuar se përfundimi i ODIHR është se zgjedhjet ishin me standard.
Cakaj përzgjodhi me kujdes pjesë nga raporti që nuk flasin mbi mungesën e kandidatëve në zgjedhje, ku nga 61 bashki, në 31 prej tyre kishte vetëm një alternativë, kandidatin e Rilindjes.
“Zgjedhjet e 30 qershorit 2019 nuk kanë qenë vetëm zgjedhje demokratike, por në fakt edhe vendosje e një shembulli të pakthyeshëm historik, duke dëshmuar se qëndrueshmëria institucioneve është me e lartë sesa shuma e interesave partiake.
Zgjedhjet e tejkaluan sjelljen e dhunshme. Raporti i OHDIR e cilëson sjelljen e PD dhe LSI, në raport me godinën e Kryeministrisë, si të dhunshme.
Një ditë pas zgjedhjeve më me rëndësi sesa emrat e rinj që janë legjitimuar në këtë proces, ka qenë dëshmia se braktisja e parlamentit nuk mund të përkthehet në avancim institucional.
Kësaj radhe kemi pasur shumë më shumë sesa bojkoti nga opozita.
Jemi ekspozuar nga një dhunë vandaliste para dhe pas procesit zgjedhor. Këtë e thotë edhe raporti.
Madje kemi pasur tentativa për bllokim të procesit të integrimit të Shqipërisë në BE. Tashmë me publikimin e raportit, ekziston një opinion se procesi zgjedhor ka qenë i rregullt”, u shpreh Cakaj.
Në raportin e OSBE/ODIHR thuhet se mbi qytetarët, veçanërisht ata të punësuar në administratën publike, është ushtruar presion për të treguar hapur bindjet e tyre politike – shkelje kjo e qartë e marrëveshjes së Kopenhagenit të OSBE-së.
Gjatë votimit, vëzhguesit e OSBE-së vunë re se në shumë qendra votim nuk respektoheshin rregullat si përshembull kontrolli i bojës nëpër gishta, kontrolli i qendrës së votimit apo sigurimi i fshehtësisë së votës dhe votimit personal, jo në grup.
Gjatë numërimit, OSBE gjeti shumë parregullsi duke filluar me faktin se shumica e grupeve të numërimit ishin të papërvojë ose përfaqësonin PS-në.
“Të paktën 14 kuti votimi të dorëzuara u deklaruan të parregullta, për shkak të vulave të humbura ose të prishura, por vetëm gjysma e këtyre rasteve u regjistruan siç duhet.
Pothuajse 10 për qind e tabelave të rezultateve kishin probleme në të gjitha rastet e vëzhguara.
Më shqetësues ishte fakti që numri i përgjithshëm i fletëve të votimit nuk u llogarit ose u krahasua me firmat në listën e votuesve”, thuhet në raport.
Gjithsesi duket se këto parregullsi të evidentuara nga OSBE/ODIHR ose janë anashkaluar nga Cakaj, ose ky i fundit ka nisur të hartojë raportin e tij. /BN/
