Duke e konsideruar të ezauruar çështjen e Raportit mbi kredibilitetin dhe ligjshmërinë e zgjedhjeve të 30 qershorit, kreu i qeverisë Edi Rama ka rikthyer vëmendjen tek propaganda dhe spektakli virtual.
Përmes një statusi në Facebook, ai ka publikuar disa mesazhe të mbërritura në telefonin e tij, ku mes të tjerëve, një çoban i shkruan për historinë e tij fatkeqe ku si pasojë e një aksidenti, atij iu rrezikua jeta e familjarëve por edhe e 70 krerëve bagëti. Por, ky i fundit ka pretenduar se falë ndihmës që ka marrë tanimë çdo gjë i është rikthyer normaliteti.
I gjithë ky komunikim virtual mes tij dhe kryeministrit duket të jetë me tejet rëndësi për kreun e qeverisë i cili ka pritur me padurim të publikojë sms si simbol të ‘bashkëqeverisjes’ dhe ‘zgjidhjeve të problemeve të popullit’.
Rama e ka bërë publik këtë mesazh, ku pas falenderimit që i bën fermeri, i është përgjigjur se i uronte çdo të mirë atij dhe familjes së tij, ndërsa askush nuk e ka marrë vesh se kush falenderon kë dhe për çfarë, mbase përveç kryeministrit dhe fermerit.
