Luigi Soreca, ambasadori i BE-së në Tiranë, ka informuar Johannes Hahn, Komisionerin për Zgjerimin, mbi situatën politike në Shqipëri dhe zhvillimet e fundit.
Kjo është bërë e ditur nga diplomati Soreca, që ka postuar në rrjet foto nga takimi.
“Në funksion të vendimit të tetorit për hapjen e negociatave, është thelbësore që fokusi të vazhdojë të përqendrohet në procesin e reformave”, shkruan Soreca.
Shqipëria dhe Maqedonia e Veriut presin nga BE që në 18 tetor të marrin një datë për hapjen e negociatave. E ndërsa për Maqedoninë e Veriut ka një dritë jeshile, shanset që Shqipëria të marrë një datë, janë minimale.
Veçanërisht pas raportit të OSBE/ODIHR mbi votimet e 30 qershorit, një proces që nuk konsiderohet as demokratik dhe as i lirë, dhe kur kriza politike në vend thellohet, duket se nga Brukseli do të ketë një përgjigje negative.
