Gjykata e Fierit ka dhënë masën e sigurisë “arrest me burg” për Daniel Braçen dhe Aleksandër Zhapajn, të arrestuar pas përplasjes që nisi në Levan të Fierit dhe përfundoi në spitalin e këtij qyteti.
Daniel Braçe u arrestua si autori i dyshuar i rrëmbimit të armës punonjësit të policisë dhe plagosjes së Aleksandër Zhapajt.
51-vjeçari nuk ndodhej në seancë, pasi Zhapaj ndodhet i shtruar te spitali i Traumës për shkak se ka marrë lëndime në trup si pasojë e përplasjes.
Në konfliktin mes dy familjeve mbetën të plagosur 5 persona. Kështu përveç Aleksandër Zhapajt u plagosën edhe Gentjan Zhapaj dhe Aldi Zhapaj, ndërsa me thikë janë plagosur Klajdi Lamaj dhe Erlind Muçaj.
Në komunikatën e parë policia njoftoi se në lidhje me ngjarjen kishte shoqëruar shtetasit Eqerem Braçe, ish-nënkryetar i komunës Levan dhe ish-drejtor i Ujësjellësit të Tiranës, dhe daniel Braçe.
Më pas emri i Eqerem Braçes nuk u përmend më nga policia, çka çoi në akuzat e ish-kryeministrit për manipulimin e ngjarjes, për faktin se Eqeremi është nipi i kryeparlamentarit Gramoz Ruçi.
