Mëngjesin e kësaj të hëne në tregun e shumicës në Korçë fermerët e zonës nuk janë lejuar të hyjnë në ambjentet e brendshme. Ata janë bllokuar me argumentin e autoriteteve të tregut të shumicës se shesin vetëm me NIPT fermeri pa qënë të pasjisur me NIPT tregëtari. Kjo është pengesa që nuk i lejon të shesin më në tregun e shumicës të fruta-perimeve.
Lidhur me këtë ngjarje ka reaguar dhe ish-deputeti i kësaj zone Niko Faber. Përmes një postimi në Facebook ai shkruan se kjo ëështë një gafë e madhe me pasoja ekonomike për fermerët dhe i bën thirrje kryebashkiakut të Korçës, Sotiraq Filo që të ndalë raprezaljet me polici dhe të lejoje tregëtimin e produkteve të këtyre fermerëve deri sa të gjendet një zgjidhje afat gjatë.
Postimi i plotë:
Ndalimi brutal që segmente të Bashkisë Korçë iu kanë bërë fermerëve korçarë ti shesin prodhimet e tyre në tregun e shumicës (se s’kanë ku ti shesin tjetër) është një gafë e madhe që po bën ky institucion.
Është gafë e madhe me pasoja ekonomike për këta fermerë të cilëve duhet t u krijojmë kushte dhe lehtësi për t i shitur prodhimet e tyre, por njëkohësisht edhe me pasoja për forcën politike që ka pushtetin. Dhe kjo e ka zanafillën që me mbylljen e tregut fshatar, që si në çdo vend të botës dhe në çdo qytet të Shqipërisë, ka egzistuar tradicionalisht. Edhe në qytetin tonë, por që u mbyll padrejtësisht me hapjen e tregut të shumicës.
Janë mijra fermerë që kanë prodhime, fruta e perime me pakicë. Mjaft cilësore dhe që kanë vështirësi për ti shitur. Shumë prej tyre në pamundësi për të gjetur mënyrë tjetër janë rrjeshtuar rrugëve nacionale duke u bërë kështu edhe burim aksidentesh.
Kjo ndodh se nuk kemi organizuar si duhet tregjet, sepse në vend që të bisedohet shtruar e të konsultohet problemi me fermerët prodhues, i biem shkurt dhe mbyllim apo ndalojmë. Ndaj i bëj thirrje Kryetarit të Bashkise, zotit Sotiraq Filo, që të ndalë raprezaljet me polici dhe të lejoje tregëtimin e produkteve të këtyre fermerëve deri sa të gjendet një zgjidhje afat gjatë.
