Banorë të Laprakës protestuan sot për ndotjen që shkakton fabrika e tullave që ndodhet në zonën e tyre.
Duke akuzuar drejtuesit e fabrikës se nuk përdorin filtra, banorët thanë se fabrika lëshon shtëllunga tymi dhe kjo ka ndikuar në shëndetin e banorëve.
Mes protestuesve që drejtuan apelin e fortë për të ndaluar katastrofën ishte edhe një fëmijë 9-vjeçar.
“Ku do rritemi ne? Do rritemi në një vend ku na hy ajri i pisët në gojë, që të sëmuremi në krejt fëmijët e vegjël. Do rrimë në një vend që të vdesim?
Tymi i tyre po na hy në fytin tonë. Para disa muajsh, mezi merrja frymë. Babi me çonte në spitale për të më shëruar. Mamit tim nga stresi i madh, nga tymrat, i dilte gjak nga hundët.
Ne duhet të rrinim tek koka e mamit (përlotet). Qaj çdo ditë për të. Çfarë do të bëjmë ne?”, tha 9-vjeçari, që përloti të pranishmit me fjalët e tij.
