Një avokat britanik që përfaqësonte gangsterët shqiptarë është qëlluar për vdekje, duke provokuar frikën se ai u ekzekutua pasi humbi disa çështje penale të profilit të lartë.
Kështu e nis artikullin Daily Mail, që rikthen në vëmendje ekzekutimin e Ravik Gurra, i cili mbante edhe pasaportën britanike.
Avokati Gurra, 50 vjeç, u qëllua me tre plumba pistolete me silenciator, ndërsa ishte ulur në një lokal me disa miq në Elbasan.
Ngjarja që tronditi mbarë opinionin dhe që ende nuk ka një autor ka ndodhur në mars të 2019.
Gazeta britanike shkruan se vrasja shokoi edhe qytetin e Hertfordshire të Harpenden, në Britani, ku Gurra jetonte me gruan e tij, Nina dhe dy vajzat adoleshente.
Gurra kishte përfaqësuar disa gangsterë shqiptarë, përfshirë këtu anëtarë të familjes Çapja, por edhe Emiljano Shullazin, i cili u shpall fajtor për zhvatje dhe drejtimin e një organizate kriminale dhe u dënua me 14 vjet, shkruan Daily Mail.
Gazeta, i referohet një avokati shqiptar, i cili ka kërkuar të mos identifikohet, shkruan se “vrasja e Ravik Gurrës ka futur në mendime të gjithë avokatët e kriminelëve. Ne nuk jemi të sigurt për të përfaqësuar mafiozin. Bandat kriminale veprojnë përtej të gjitha kufijve. Nëse ata vrasin avokatë në Shqipëri sepse ata humbasin një çështje, ata mund t’i vrasin ata në vende si Gjermania dhe Anglia gjithashtu”.
Një burim shprehet për median britanike se policia shqiptare ka dy pista hetimi në lidhje me vrasjen: ose ka qenë ndëshkim për çështjet e humbura, ose është eliminuar nga rivalët e Çapjave në Elbasan.