5 persona raportohet se janë plagosur nga të shtënat me armë zjarri dhe përdorimi i sendeve të forta në qytetin e Fierit mbrëmjen e sotme.
Sipas të dhënave paraprake mësohet se ka ndodhur një sherr mes dy grupeve, të cilët në fillim janë konfliktuar në fshatin Levan, ndërsa më pas sherri ka degjeneruar në përdorimin e armëve në ambientet e spitalit.
Mësohet se “një grup prej 5 vetash ka ardhur në urgjencën e spitalit dhe kanë qëlluar me armë duke alarmuar gjithë spitalin”
Tre persona janë plagosur me armë zjarri, ndërsa dy të tjerë me sende të forta. Nuk dihen ende rrethanat e këtij sherri, në të cilën janë përdorur edhe levat.
Policia ka mbërritur në vendin e ngjarjes duke arrestuar autorët. Kujtojmë se një prej të plagosurve ndodhet në gjendje të rëndë për jetën.
