Ndërsa mbeten pak ditë nga konfirmimi i qeverisë së re të Italisë ose shpallja e zgjedhjeve të reja, dy aleatët Lëvizja 5 Yjet dhe Partia Demokratike vazhdojnë të mos kenë unitet rreth programit politik por edhe pikëpyetje rreth ndarjes së posteve ministrore. Ultradjathtistët e Mateo Salvinit apelojnë për zgjedhje dhe paralajmërojnë daljen në protesta më 19 tetor.
Arritja e një kompromisi mes partive Lëvizja 5 Yjet dhe demokratëve italianë po bëhet më e vështirë më kalimin e orëve.
E ardhmja e koalicionit u vu të premten në pikëpyetje nga kryetarët Luigi Di Maio dhe Nicola Zingaretti. Shkak u bë parashtrimi i një manifesti të ri programor me 20 pika të panegociueshme nga 5 Yjet.
“Pikat tona janë të qarta dhe ne nisim punën menjëherë nëse ato përfshihën në programin qeverisës. Në të kundërt, do të ishte më mirë të shkonim në zgjedhje, dhe unë do thosha, sa më shpejt të jetë e mundur,” deklaroi Di Maio në konferencë.
Homologu i tij Nicola Zingaretti replikoi duke i kërkuar rivalit të vjetër të heqë dorë nga kërcënimet.
“Po punojmë me seriozitet për t’i dhënë Italisë një qeveri të re, europeiste, sociale dhe të gjelbër. Por mjaft me ultimatumet e papranueshme, ose nuk shkojmë asgjëkundi,” reagoi kreu i demokratëve.
Mësohet se pikat më të debatuara të programit të propozuar janë shkurtimi i numrit të parlamentarëve dhe mbajtja në fuqi e një dekreti kundër anijeve me refugjatë që hyjnë pa leje në ujërat e vendit, por përplasjet vazhdojnë edhe për rolin që Di Maio do të kryejë në kabinet.
Delegacionet e dy partive kanë kohë deri javën e ardhshme për të kapërcyer mosmarrëveshjet me ndihmën e kryeministrit të mandatuar, Giuseppe Conte.
Ndërkohë, shefi i partisë “Lidhja”, Matteo Salvini, ka kërkuar mobilizimin e mbështetësve në sheshe, duke nisur me një protestë masive më 19 tetor ku do të përsëritet apeli për mbajtjen e zgjedhjeve të reja.
