Gjykata e Tiranës ka liruar nga qelia biznesmenët e arrestuar për falsifikim të biletave të transportit urban në Tiranë.
Gjyqtari Altin Abdiu ka vendosur masën e sigurisë arrest shtëpie për Ferdinant Ibraimin dhe djalin e tij Anastas Ibrahimi. E njëjta masë u dha edhe për Klodian Qaton. Fatos Vrapi, pronari i linjës urbane të Tiranës së Re është lënë i lirë me garanci pasurore në shumën 1 milion lekë të reja. Për bashkëshorten e tij Albana Vrapi dhe Erisa Vorën u vendos detyrim paraqitje, në përputhje me kërkesën e prokurorisë. Në burg është lënë Aldi Duka dhe Lulëzim Allaraj.
Ndërkohë, përveç Albana Vrapit dhe Erisa Vorës, prokuroria kërkoi arrest me burg për të arrestuarit e tjerë.
Sipas hetimeve, arrestimi i këtyre shtetasve u bë pasi dyshohet se duke bashkëpunuar me njëri-tjetrin kanë falsifikuar bileta të transportit urban në kohë dhe periudha të ndryshme, me qëllim shmangien e detyrimeve tatimore dhe përfitim financiar të disa shoqërive operatore në transportin urban në qarkun Tiranë. Këta shtetas përdornin bileta urbani të falsifikuara dhe jo të prodhura në Shtypshkronjën e Letrave me Vlerë, të cilat i kishin hedhur në qarkullim duke përfituar shuma të konsiderueshme monetare.
MASAT E SIGURISË
Arrest me burg: Aldi Duka, 39 vjeç, banues në Tiranë, me detyre dispeçer i një linje autobuzash; Lulëzim Allaraj, 47 vjeç, banues në Tiranë, me detyrë dispeçer i një linje autobuzash.
Arrest shtëpie: Ferdinant Ibrahimi, 60 vjeç, banues në Tiranë, me detyrë administrator dhe ortak i një shoqërie transporti; Anastas Ibrahimi, 20 vjeç (djali i Ferdinantit) banues në Tiranë, të cilit iu gjetën të fshehura provat materiale (150 000 bileta urbani të falsifikuara), në tentativë për t’i asgjësuar. Klodian Qato, 42 vjeçe, banuese në Tiranë, me detyrë ekonomiste në një shoqëri autobusash.
Garanci pasurore: Fatos Vrapi, 60 vjeç, banues në Tiranë, me detyrë administrator dhe ortak i një shoqërie transporti.
Detyrim paraqitje: Albana Vrapi, 51 vjeçe, banuese në Tiranë, me funksion administratore dhe ortake e një shoqërie transporti; Evisa Vora, 33 vjeçe, banuese në Tiranë, me detyrë administratore e një shoqërie transporti.
Profil/ Bosët e Urbanëve që lobuan për rritjen e çmimit, në pranga për falsifikim biletash
