Një i ri shqiptar u gjet i pajetë brenda makinës së tij në Itali pasditen e së martës. Viktima, S.V., 27 vjeç, i gjetur me një plumb në kokë, dyshohet se është vetëvrarë, raportuan mediat lokale. Megjithatë, veprimet e mëtejshme hetimore pritet të hedhin dritë mbi ngjarjen.
I riu jetonte në Bari dhe punonte për një kompani pastrimi në veri të Puglia-s. “Lecce news 24”, në një artikull të publikuar për ngjarjen shkruan se ka një pikë të errët në këtë histori. “Si ka mundësi që u gjet i pajetë në Salento dhe në rast se konfirmohet vetëvrasja, pse e ndërmori aktin ekstrem larg shtëpisë?”.
Ndërkohë, prokurorja Donatella Palumbo firmosi urdhrin e kryerjes së autopsisë.
Trupi i pajetë i 27-vjeçarit u gjet pasditen e së martës në makinën e tij tip “Volkswagen Polo” ngjyrë gri, në rrugën që lidh Ugento-n me Casarano-n. Mjeti ishte parkuar në një vendqëndrim të posaçëm në autostradën 274. Pranë trupit të pajetë të shqiptarit, pa precedentë të mëparshëm në shtetin fqinjë, u gjet një pistoletë. Armë që dyshohet se i ka marrë jetën të riut.
/Boldnews.al/
