Ditmir Bushati, ish-ministër i Jashtëm, dhe Edi Rama, kryetar i PS-së dhe Kryeministër, kanë debatuar ashpër mes tyre në mbledhjen e djeshme të Kryesisë lidhur me rastin e Valdrin Pjetrit, kryebashkiakut të Rilindjes që është subjekt i ligjit të dekriminalizimit, pasi ka fshehur një dënim të dhënë nga drejtësia italiane.
Bushati deklaroi pas mbledhjes së Kryesisë se PS, partitë e tjera, dhe sistemi politik në vend, ka nevojë për një reformism të thellë, që do t’i jepte fund përfshirjes së personave me probleme me ligjin, apo të shkuar kriminale, në politikë.
Madje Bushati tha se të gjithë duhet të mbajnë përgjegjësi lidhur me kandidimin e Bushatit në Shkodër, duke dalë kështu kundër kryeministrit, i cili përgjegjësinë lidhur me këtë situatë ia faturoi vetëm Valdrin Pjetrit.
Lidhur me përplasjen mes Bushatit dhe Ramës ka reaguar edhe Mero Baze, botues i gazetës Tema, i njohur si mbështetës i Kryeministrit.
Baze shkruan se Ditmir Bushati nuk besonte se do të bëheshin zgjedhje më 30 qershor dhe se kishte dalë kundër zgjedhjeve. Duke zbuluar ato që mund të quhen parapaskena, Baze ka treguar bisedën me Bushatin para 30 qershorit, ku sipas tij ky i fundit i ka thënë se kishte drojën se mijëra demokratë do vërshonin në qendra votimi dhe do t’i bllokonin, dhe se qeveria nuk mund të fuste popullin në burg.
“Luan Harusha ishte pesimist se socialistët në Shkodër, ishin braktisur nga PS dhe nuk ishin të motivuar për të mbështetur kandidatin e tyre, pasi sipas Luanit, ishte i mbështetur në distancë nga njerëz të Doshit.
Ishte fjala për Valdrinin. Ditmir Bushati përpiqej t’ia hidhte poshtë rezervat ndaj kandidatit dhe e konsideronte të duhurin për PS, por fokusohej tek nevoja që PS duhet të bënte marrëveshje me PD para zgjedhjeve, ndryshe nuk kishte zgjedhje.
Madje, për këtë s’më la gjë pa thënë dhe mua, që isha partizan i shkuarjes në zgjedhje me çdo çmim, duke më kujtuar që kisha marrë më qafë dhe Berishën me qëndrime të tilla dikur.
Në fakt, po e rikujtoj këtë debat pasi dëgjova Ditmir Bushatin sot, që me shumë të drejtë thotë se rasti i Valdrinit derdhi pikën e fundit të ujit.
Tani nëse do gjykoja si Bushati, sot duhet të thosha që kam dëgjuar Bushatin ta mbrojë Valdrinin dhe në debat jo publik, dhe duhet të mbajë përgjegjësi, ashtu siç duhet të them që Luani ka arsye të jetë dhe më i mërzitur se Ditmiri, pasi edhe ata socialistë që kishte në punë, ja hoqi sot Edi Rama. Por është e padrejtë të them që Ditmiri mbronte një të inkriminuar, pasi as ai, as Luani, nuk e mbronin dhe kundërshtonin Valdrinin për atë që u bëri gjëmën, por për arsye të tjera”, shkruan ndër të tjera Baze.
