Tom Doshi dhe Ilir Beqja do të jenë zëvendësuesit e Valdrin Pjetrit, si drejtues politikë në Shkodër, për strukturat e Partisë Socialiste, deri në përcaktimin e një emri përfudimtar.
Burime nga Partia Socialiste theksojnë se dy deputetët, Doshi i PSD-së, dhe Beqja i PS-së, ish-ministër i Shëndetësisë, do të angazhohen për të drejtuar strukturat politike për Shkodrën,dhe rajonin e veriut, ndërkohë që procesi i ndryshimeve që do të ndodhin për zëvendësimin e drejtorëve rajonalë, do të monitorohet nga një tjetër deputet, Luan Harusha.
Një ditë më parë, kreu socialist Edi Rama ka mbledhur drejtuesit politikë për qarqet e Veriut, ku vëmendjen kryesore e ka pasur në Shkodër, atje ku situata për socialistët mbetet e nderë. Kjo për faktin se drejtruesi politik i qarkut, Valdrin Pjetri, njëherëz edhe kandidati i Rilindjes në votimet e 30 qershorit për Bashkinë më të madhe në veri të vendit, është subjekt i ligjit të dekriminalizimit.
Pjetri është larguar nga strukturat e PS-së dhe në kushtet aktuale, Rama ka menduar të zëvendësojë emrin e tij si drejtues politik në qarkun e Shkodrës me dy emra, atë të Tom Doshit, që në zgjedhjet e fundit parlamentare, kandidoi për PSD-në e Skënder Gjinushit, por edhe Ilir Beqajn, i cili vite më parë ka qenë i angazhuar me organizimin e strukturave në këtë qark.
Pjetri zëvendësoi si drejtues politik Ditmir Bushatin, ish-ministrin e Jashtëm, të mënjanuar nga Rama me ndryshimet e fundit qeveritare.
Bushati u shfaq si kritik ndaj Ramës, veçanërisht në debatin e lindur për ndryshimin e kufinjve mes Kosovës dhe Serbisë.
E ndërsa pritej që një nga emrat që mund të zëvendësonte Pjetrin të ishte ish-zv.kryeministrja Senida Mesi, duket se procesi ka kaluar në një tjetër fazë, atë të caktimit përkohësisht të dy deputetëve, njëri prej të cilëve me shumë influencë në strukturat e majta në Shkodër, Tom Doshi.
