Santiago Malko, ish-punonjës policie në Patrullën e Përgjithshme në Policinë e Tiranës, u ekzekutua mbrëmjen e së martës në rrugën Xhanfize Keko në kryeqytet.
26-vjeçari, që sipas burimeve policore, zotëronte disa lokale të basteve sportive, që janë mbyllur prej fillimit të 2019, u qëllua me armë zjarri, ndërsa një nga plumbat e ka goditur në pjesën e kokës.
Në trupin e viktimës janë gjetur 10 plumba.
Viktima ndodhej në një automjet tip BMW X5, ndërsa policia duket se ka gjetur një të dyshuar si autor të krimit.
Burime policore bëjnë të ditur se i dyshuari është shtetasi D.A.
Automjeti i viktimës është gjetur i përplasur me murin e një ndërtese pranë vendit të ngjarjes, ndërsa rreth 25 minuta më vonë, policia u njoftua se një automjet po digjej në fshatin Ferras, në afërsi të Linzës.
Policia dyshon se autorët kanë përdorur dy automjete, njërin prej të cilëve e kanë djegur, ndoshta për të humbur gjurmët.
Burime policore bëjnë të ditur se në vendin e ngjarjes, grupet hetimore kanë fiksuar disa prova, por kanë sekuestruar edhe kamerat e sigurisë.
Njoftimi i policisë
Policia theksoi se krimi ka ndodhur rreth ores 22:20 minuta, ne rrugen “Xhanfize Keko”, ku persona ende të paidentifikuar kanë qelluar me armë zjarri drejt një automjeti në lëvizje tip “BMW”. Për pasoje ka humbur jeten një i ri, 26-vjeçari S.M.
Autorët dyshohet se janë larguar ne drejtim të fshatit Ferraj, ku dhe kane djegur mjetin e tyre, tip “Mercedes Benz”.
Shërbime të shumta policore kanë ngritur disa pika kontrolli në kryeqytet dhe janë vënë në ndjekje të autorëve.
Ndërkohë ekspertet e kriminalistikes po mbledhin prova në vendngjarje, që do të ndihmojnë hetimin.
Policia ka nisur të shoqërojë persona që mund te kenë dijeni për rrethanat e krimit.
Specialistë nga Sektori për Krimet e Renda në Drejtorine Vendore të Policisë Tiranë janë angazhuar si pjesë e grupit të posaçem hetimor për zbardhjen e ngjarjes dhe vënien para përgjegjësisë ligjore të autorëve, thuhet në njoftim.
E shkuara e viktimës
Santiago Malko, është një emër i njohur për policinë e Tiranës. Më 16 prill 2016, ai ka pasur një konflikt me vëllezërit Edmond e Gentian Lashi, 34 e 26 vjeç. Të dyja palët, kishin në pronësi lokale bastesh sportive në të njëjtën zonë, por sipas Policisë konflikti ka ndodhur në lokalin e Edmond Lashit.
Ka qenë ish-polici Santiago Malko që ka shkuar në pikën e basteve të vëllezërve Lashi dhe është konfrontuar fizikisht me ta. Nga përleshja fizike, 23-vjeçari është plagosur lehtë, pasi është goditur me grusht në hundë.
Ish-polici ka tentuar të përdorë armën, madje duke goditur njërin prej vëllezërve me qytën e saj.
Më pas dy vëllezërit kanë ndërhyrë dhe ia kanë marrë armën, duke parandaluar përshkallëzimin e dhunës.
Gjithashtu, ai është fiksuar nga kamerat edhe në një tjetër përplasje me armë në zonën e ish-bllokut, por nga hetimet nuk ka rezultuar si i përfshirë direkt dhe pozicioni i tij është sqaruar.
