Gangsterët shqiptarë në Angli janë krejtësisht shpërfillës ndaj drejtësisë britanike dhe këtë e kanë treguar me anë të disa postimeve në mediat sociale, ku shihet jeta e luksit që ata bëjnë edhe pse janë pas hekurave.
E përditshmja britanike “The Sun” ka bërë një shkrim për këtë rast, ku thuhet se kriminelët e lidhur me bandën famëkeqe ‘Hellbanianz’ po ndajnë fotografi në Instagram duke qeshur nga qelitë e tyre.
Ndërkohë, besohet se rrjetet shqiptare të krimit janë pas shumë rasteve të njëpasnjëshme vjedhjesh të dhunshme në pjesën jug-lindore të Londrës.
‘Daily Telegraph’ raporton se fotot u shfaqën në llogaritë private në Instagram të Fabion Kuçit dhe Azem Dajçit, të cilët aktualisht janë duke vuajtur dënimin për vjedhje të dhunshme në burgun e Ëormëood Scrubs.
Në një tjetër foto shihet Agron Demarku mbi shpatullat e një të burgosuri tjetër.
Demarku ka qenë kreu i një bande gangsterësh që janë dënuar në total me 63 vjet burg, pasi drejtonin disa bordello ku shfrytëzoheshin femrat e trafikuara, përfshirë edhe adoleshentet.
Sipas policisë londineze, kriminelët shqiptarë kryejnë grabitje të dhunshme nëpër shtëpi dhe argjendari, të cilat i dërgojnë kontrabandë në Shqipëri.
The Sun ka raportuar me anë të një artikulli para disa kohësh, se si bandat shqiptare që kontrabandonin dërgesa të mëdha kokainë direkt nga Evropa kanë ndryshuar fytyrën e tregut të drogës në Mbretërinë e Bashkuar.
