Kryetarja e Lidhjes Demokratike të Gruas së Shqipërisë, Albana Vokshi ka ngritur shqetësimin për qeverisjen e kryeministrit Edi Rama në samitin e Grave të Partive Popullore Europiane që u mbajt në Spanjë.
Nën drejtimin e Europarlamentares Doris Pack, deputetja e PD-së Vokshi shprehu qëndrimin e Partisë Demokratike për reformën në Drejtësi duke thënë se PD po e përmirëson në përputhje me rekomandimet e Komisionit të Venecias pasi Rama po bën çdo përpjekje për ta kapur sistemin e drejtësisë.
“Kryeministri po qeveris me bandat dhe ka arritur në rekorde të paimagjinueshme korrupsioni e abuzimi, dhe është kjo arsyeja pse ai kundërshton me çdo kusht një reformë në drejtësi, që do të sillte drejtësi të pavarur. Një drejtësi e pavarur, do të thotë ndëshkim për korrupsionin e tij”, tha Vokshi.
Në takimin me Doris Pack, Presidenten e Forumit të Gruas të Partive Popullore Europiane, Zonja Vokshi shprehu shqetësimin për fenomenin e braktisjes së Shqipërisë për shkaqe ekonomike. Ajo tha se shqiptarët janë të dytët në listat e azilkërkuesve pas refugjatëve të luftës. Deputetja Vokshi denoncoi abuzimet e pushtetit në Tiranë dhe rritjen e korrupsionit në sektorët jetikë si shëndetësia, ku miliona euro vidhen nga koncensionet e sajuara për miqtë e kryeministrit dhe të ministrit të shëndetësisë. Mbrojtja e krimit ekonomik dhe legalizimi i korrupsionit janë arsyet pse Rama kërkon të pushtojë institucionet e drejtësisë.
