Zbardhen detaje nga plagosja e 48-vjeçarit, në një fshat të Shijakut, gjatë tentativës së tre personave për t’i grabitur shtëpinë.
Autorët tentuan të vjedhin një banesë në fshatin Pjeshkë të Shijakut, por u zbuluan nga i zoti shtëpisë, që mbeti i plagosur gjatë përleshjes me tre autorët, njëri prej të cilëve i armatosur me armë zjarri. Sipas Policisë, ngjarja ka ndodhur mëngjesin e djeshëm, rreth orës 02:35, ndërsa mësohet se autorët janë konfliktuar fizikisht me 48-vjeçarin, Fatmir Musai, pronari i banesës, i cili është plagosur dhe ndodhet në spitalin e Durrësit.
Gjatë përleshjes, ai ka marrë dëmtime të lehta, kryesisht në këmbën, por pa rrezik për jetën. Pasi u mjekua në spitalin e Durrësit, 48-vjeçari u largua drejt banesës, pa probleme serioze. Policia tha dje se kryefamiljari është plagosur me mjete prerëse, por mjekët e spitalit të Durrësit thanë se i kanë hequr saçme dhe në këtë formë rezulton që të jetë plagosur me armë gjahu.
NGJARJA
Sipas Policisë së Durrësit, më datë 21 gusht, rreth orës 02:35, në fshatin Pjeshkë, të Shijakut, tre persona, njëri prej tyre me armë zjarri, kanë tentuar të grabisin banesën e shtetasit Fatmir Musai, 48 vjeç. Autorët janë diktuar nga pronari i banesës dhe janë konfliktuar fizikisht me njëri-tjetrin. Ata kishin planifikuar që të nisnin “aksionin” rreth orës 02:35, me idenë se ky ishte orari më i mirë për të vepruar, pasi supozohet që anëtarët e kësaj familjeje të ishin në gjumë.
Por, në momentin që ata po futeshin në ambientet e brendshme të shtëpisë, 48- vjeçari Musai i zbuloi dhe u përlesh fizikisht me ta. Gjatë përleshjes, kryefamiljari mbeti i lënduar në këmbë, pasi autorët e qëlluan me mjete të forta, sipas Policisë. Megjithëse mjekët thotë se është qëlluar me armë gjahu. Njëri prej tre autorëve ishte i armatosur dhe dyshohet se ka qëlluar në drejtim të tij. Pasi e qëlluan disa herë dhe e lanë të shtrirë në tokë, hajdutët u larguan me shpejtësi duke shfrytëzuar rrugicat e errëta të fshatit Pjeshkë, që ndodhet vetëm pak kilometra larg Shijakut.
HETIMET
Menjëherë pasi u vunë në dijeni për ngjarjen e rëndë, shërbimet e Policisë shkuan në vendin e ngjarjes ku nisën hetimet për zbardhjen e saj dhe identifikimin e autorëve. Policia shoqëroi disa persona në ambientet e Komisariatit të Policisë në Shijak, kryesisht banorë të fshatit dhe të zonës, të cilët u morën në pyetje për këtë ngjarje.
“Kemi shoqëruar disa persona, të cilët i kemi marrë në pyetje. Ata kanë mohuar të kenë lidhje apo dijeni me këtë ngjarje, por ne mendojmë se autorët janë banorë të kësaj zone. Fakti që ata janë përleshur me të zotin e shtëpisë dhe nuk e kanë qëlluar me armë zjarri, për ne do të thotë se ata nuk kanë dashur ta lëndonin. Pra, në këto kushte, mendojmë se kemi të bëjmë me njerëz që e njihnin të zotin e shtëpisë, ndryshe do kishin përdorur armën”, thanë burime nga grupi i hetimit.
Gjatë muajve të verës, në qytetin e Durrësit dhe rrethinave të tij, vjedhjet dhe grabitjet kthehen në normalitet. Hajdutë dhe kontingjente krimi nga vende të ndryshme të vendit, tre muajt e verës e zhvillojnë aktivitetin e tyre në Durrës.
Deshmia
Fatmir Musai, 48 vjeç, mbeti i lënduar gjatë përleshjes me tre autorët që kishin shkuar për të vjedhur shtëpinë e tij, në fshatin Pjeshkë të Shijakut. Për policinë, 48-vjeçari ka pohuar: “Ishte ora rreth 02:30 e mëngjesit. Dëgjova që diçka po lëvizte jashtë në oborr. U ngrita nga krevati, pa e ndezur dritën.
Nga dritarja pikasa tre persona që ndodheshin në ambientet e jashtme të shtëpisë dhe po përpiqeshin të futeshin brenda. Nuk kam armë dhe në këto kushte e vetmja mundësi ishte të përleshesha me ta. Në momentin që njëri prej tyre u fut në ambientet e brendshme të shtëpisë, e qëllova. Në këtë kohë afrohen dy djemtë e tjerë, njëri prej tyre kishte edhe një armë në dorë. Të tre nuk munda t’i përballoja.
Ata më qëlluan disa herë në pjesë të ndryshme të trupit, ndërsa njëri prej tyre më qëlloi me një levë hekuri në këmbë duke më lënë të shtrirë në tokë. Më pas u larguan, pasi familja u ngrit e tëra dhe komshinjtë gjithashtu. Nuk arrita t’i identifikoja, pasi ishin të maskuar dhe ishte errësirë”.
PANORAMA
