Ish-zv.kryeministrja Senida Mesi, aktualisht deputete e Qarkut të Shkodrës, ka reaguar përmes një postimi lidhur me deklaratën e bërë një ditë më parë, nga kreu demokrat Lulzim Basha.
Ky i fundit tha se dega e PS-së në Shkodër kontrollohet nga Tom Doshi dhe Pëllumb Gjoka, të cilin e akuzoi si trafikant dhe përfaqësues i “Bajrave”.
Referuar debatit të zbardhur nga mbledhja e ditës së dielë të organizuar nga Partia Socialiste në Shkodër, para konstituimit të këshillit bashkiak, Basha shkruante në rrjet se “dëshmia e Mesit se votat për Edi Ramën në Velipojë i mbledh një trafikant droge që pastron paratë e krimit në Tiranë, rikonfirmon se vendi qeveriset nga një kryeministër i kapur nga krimi”.
Por, duke reaguar ndaj Bashës, deputetja socialiste në Shkodër shprehet se procesverbali i publikuar është shkruar në zyrat e PD-së.
“Po të ishte burrë, s’do kishte patur nevojë të më citonte dhe të thoshte atë çfarë unë paskam ‘dëshmuar’, por do e kishte thënë vetë. Po të ishte lider, do të kishte gjetur vetë provat dhe do të kishte dërguar gjithë të fortët dhe trafikantët pas hekurave që në kohën kur ishte Ministër i Brendshëm”, shkruan Mesi.
Postimi i Senida Mesit
Mora vesh që Lulzim Basha, ka nevojë për mua për “kauzën e tij RAMA IK”, se normal edhe ato pak demokratikas që kishte i largoi dhe përmes “proçesverbalit” të mbledhjes së PS Shkodër të shkruar në zyrat e PD-së kërkon ndihmë.
Po të ishte burrë, s’do kishte patur nevojë të më citonte dhe të thoshte atë çfarë unë paskam “dëshmuar”, por do e kishte thënë vetë.
Po të ishte lider, do të kishte gjetur vetë provat dhe do të kishte dërguar gjithë të fortët dhe trafikantët pas hekurave që në kohën kur ishte Ministër i Brendshëm.
Lulzim Basha, betejat e mija në jetë i kam bërë dhe do vazhdoj t’i bëj vetë, me integritet dhe dinjitet. Po ti kur do i bësh i vetëm betejat e tuaja?
Lulzim Basha, nëse do të bësh ndryshimin, krijo besimin dhe parakushti është të thuash të vërtetën. Njerëzit mund të falin gabimet e mendjes por jo ato të shpirtit.
Nuk jam unë as shkaku e as problemi, shiko nga vetja dhe së paku të kuptosh një herë të vetme se loja jote jashtë sistemit ka vetëm një emër Dështim, ndërsa ai që sjell dështimin e ka një emër Dështak.
