Një artist francez, i cili i përdorte tingujt e natyrës në muzikën e tij, është mbytur nga një ari në Kanada.
Miqtë e tij thanë se Julien Gauthier, 44 vjeç, ishte viktimë e një sulmi nga një ariu, që hyri në një kamp afër fshatit Tulita, në pjesën veriperëndimore të Kanadasë.
Ai ishte duke udhëtuar së bashku me biologen Camille Toscani në një zonë pak të banuar në veriperëndim të Kanadasë, ku po incizonte zëra të rinj për punën e tij në muzikë.
Ata kishin planifikuar të udhëtonin nga Fort Providence në Inuvik, qytete që mes vete janë më larg se 1600 kilometra.
Toscani i tha gazetës franceze “Le Parisien” se ariu hyri në kampin e tyre gjatë natës dhe e tërhoqi zvarrë muzikantin Gauthier.
Policia kanadeze tha se kanë pranuar një telefonatë nga Toscani pasi ajo kishte arritur të kontaktonte me një grup tjetër të udhëtarëve pas sulmit nga ariu. Për shkak të motit të keq, policia nuk mundi ta gjente trupin e muzikantit deri të nesërmen.
Zyrtarët kanadezë ende nuk e kanë identifikuar llojin e ariut që është përfshirë në këtë incident, por thanë se kanë vrarë një ari të zi dhe një të murrmë si pjesë e hetimeve për këtë rast.
Trupat e kafshëve do të analizohen për të parë se a kanë qenë të përfshira në sulm, shkruan “The Guardian”.
