Valdet Rama, i cili tha jo Kukësit duke vendosur të mos rikthehet te verilindorët, ka gjetur menjëherë një skuadër të re për të vijuar karrierën.
Ish-futbollisti i kombëtares shqiptare është prezantuar te skuadra e ligës së tretë të futbollit gjerman Meppen duke u rikthyer në Gjermani pas 2 vitesh pasi në sezonin 2016-2017 ishte pjesë e Wurzburger Kickers. Siç shkruan edhe vetë klubi i Meppen në faqen zyrtare Rama ka firmosur për 2 vite me skuadrën e tij të re dhe do të mbajë veshur fanellën me numër 19.
Afrimi i lojtarit shqiptar është një ëndërr e bërë realitet për drejtuesit e Meppen dhe për trajnerin Christian Neidhart i cili e ka kërkuar me ngulm. Në marrëveshjen mes Ramës dhe klubit të ligës së tretë gjermane është përfshirë edhe opsioni i rinovimit pas 2 vitesh, nëse 31-vjeçari bind me paraqitjet e tij.
Rama e kishte arritur që më herët akordin me Meppen por transferimi u shty deri tani pasi shqiptari ishte nën kontratë me Kukësin për pjesëmarrjen në Kupat e Europës, njofton klubi gjerman.
