Maksim Hamitaj u pezullua nga detyra si drejtor i burgut 313 në Tiranë, ndërsa vendin e tij e ka zënë Qazim Hoxha. Ky i fundit mësohet se ka drejtuar burgun e Durrësit dhe prej ditës së sotme është komanduar si drejtor i burgut 313.
Ndryshimi në drejtimin e një prej burgjeve kryesore në vend ka ardhur me urdhër të Drejtorit të Përgjithshëm të Burgjeve, Agim Ismaili.
Raportohet se Hamitaj është gjetur me shkelje, duke i siguruar trajtim preferencial disa të burgosurve sa i takon takimeve me të afërmit e tyre.
Dyshohet se një prej të burgosurve që ka përfituar është edhe Emiljano Shullazi, i dënuar nga Gjykata e Krimeve të Rënda me 14 vite burg.
Ministrja e Drejtësisë, Etilda Gjonaj, gjatë një deklarate për shtyp paralajmëroi se të gjithë drejtuesit e burgjeve do të kalojnë në një “sitë” të imtësishme kontrolli.
Ministria e Drejtësisë ka hapur garën për drejtorë burgjesh, duke paralajmëruar kështu ndryshime në drejtimin e disa prej institucioneve të vuajtjes së dënimit. Me anë të një njoftimi për mediat, Ministria e Drejtësisë bëri të ditur kriteret dhe mënyrën se si do të bëhet përzgjedhja.
