Hetimet për vrasjen e ndërtuesit Vasil Biba, i gjetur i vrarë dhe i dekompozuar në shkurt të këtij viti kanë zbuluar thirrje dhe mesazhe telefonike nga borxhlinjtë. Policia dhe prokuroria posedojnë tabulatet e komunikimeve të Bibës, ndërsa është kërkuar identifikimi i personave të cilët kanë pasur thirrje në telefonin e ndërtuesit të vrarë dhe të groposur në Dajt.
Ndërtuesi Vasil Biba i vrarë dhe i groposur në Priskë, është kërcënuar në mënyrë të herëpashershme në telefon. Madje ai ka pasur edhe mjaft telefonata të humbura, në numrin e tij telefonik që ai ka pasur në muajt e fundit përpara se të vritej. Një konfirmim i tillë ka mbërritur pranë grupit të hetuesve, nga një prej kompanive të telefonisë së lëvizshme, ku ka qenë i regjistruar si abonent ndërtuesi Vasil Biba.
Menjëherë pas marrjes së këtyre komunikimeve telefonike, si thirrje apo mesazhe, policia mësohet se ka kërkuar nga kompanitë identifikimin e abonentëve që posedonin numrat e telefonit që kanë kryer thirrje në telefonin e Bibës. Një pjesë e këtyre telefonuesve sipas policisë janë borxhlinjtë që kërkonin paratë Bibës, për kontratat e pambyllura. Ky i fundit u gjet i vrarë me 14 shkurt të këtij viti, afërsisht dy muaj pasi ishte denoncuar i zhdukur. Dyshimet e policisë, për krimin janë përqëndruar në pistën e vrasjes për shkak të borxheve që ai ai dhe bashkëshortja e tij Elsa Biba, kishin pasur ndaj personave të ndryshëm. Po kështu ata janë denoncuar edhe për akuzën e mashtrimit me shitjen e apartamenteve të ndryshëm në Tiranë. Po ashtu gjatë vitit të kaluar, Biba është dënuar për akuzën e mashtrimit me taksat dhe tatimet, ndërsa kompania e tyre “FELSABI”, rezultonte debitore në shumën e 639 milionë lekëve.
