Monika Kryemadhi, kryetare e LSI-së, po zhvillon një takim me kreun demokrat Lulzim Basha, në zyrën e këtij të fundit në selinë e Partisë Demokratike.
Pas më shumë se dy javë pushimesh, duket se kryetarja e LSI-së dhe kreu demokrat Lulzim Basha, do të diskutojnë mbi aksionin opozitar që pritet të ndërmerret në shtator.
Burime nga PD shprehen se muajin e ardhshëm do të ketë një riaktivizim të protestave opozitare, por jo vetëm. Pritet që opozita të aplikojë një tjetër strategji këtë vjeshtë me synim rrëzimin e Kryeministrit Edi Rama dhe çuarjen e vendit drejt zgjedhjeve të parakohshme parlamentare, përmes një qeverie tranzitore.
Por ndërsa PD e ka si kusht largimin e Ramës dhe qeverinë tranzitore, parti të tjera opozitare, përfshi edhe LSI, kanë artikuluar idenë se opozita e bashkuar mund të fitojë zgjedhjet edhe me Ramën kryeministër.
Ndërkohë çështja më emergjente që duhet të vendoset nga opozita është pikërisht ajo se çfarë do të bëhet me Bashkinë e Shkodrës, atje ku valdrin Pjetri është tërhequr nga marrja zyrtarisht e detyrës, pas zbulimit të dokumenteve që provvojnë se ai është dënuar në Itali me 18 muaj heqje lirie. Kjo do të thotë se Pjetri është subjekt i ligjit të dekriminalizimit, ndërsa prokuroria ka nisur hetimet ndaj tij.
Pritet që opozita të dalë me një vendim lidhur me qëndrimin që do të mbajë nëse në Shkodër do të mbahen zgjedhjet e pjesshme vendore, edhe pse nuk dihet se kush do e dekretojë datën për mbajtjen e tyre.
Kjo për faktin se Presidenti i Republikës ka caktuar 13 tetorin si ditën kur duhej të zhvilloheshin zgjedhjet vendore, duke rrëzuar 30 qershorin si datë.
