Aktivistët e nismës “Thurje” kanë vendosur një fotografi të Ardit Gjoklajt te parku i liqenit artificial si simbolik memorial.
Ardit Gjoklajt ju shkaktua vdekja nga një ekskavator i kompanisë gjatë punës në landfill e Sharrës. Në atë landfill të administruar nga Bashkia e Tiranës, fëmijë, gra dhe burra u punësuan në shkelje të ligjit dhe u shfrytëzuan në mungesë të kushteve të punës dhe sigurisë
Ky veprim i tyre vjen pas vendosjes së memorialit turk nga kryebashkiaku Erion Veliaj ku në një pllakë prej betoni, janë gdhendur emrat e 251 të rënëve që kontribuan në dështimin e grushtit të shtetit të 15 korrikut 2016 në Turqi, kundër qeverisë së Presidentit Erdogan.
Përmes një postimi në Facebook ata shkruajnë se ky memorial u vendos për gjithë viktimat e babëzisë së pushtetit dhe urojnë që kryebashkiaku Veliaj të mos ia vjedhë edhe memorialin Arditit, ashtu siç iu vodh jeta.
Postimi i plotë:
Aktivistë të Nismës Thurje vendosën sot një memorial për gjithë viktimat e babëzisë së pushtetit pranë liqenit artificial të Tiranës.
Memoriali i kushtohet të gjithë shqiptarëve që kanë humbur jetën si pasojë e korrupsionit dhe papërgjegjshmërisë së klasës tonë politike dhe simboli i tyre mbetet 17 vjeçari Ardit Gjoklaj i cili u vra në landfillin e Sharrës si pasojë e korrupsionit.
Duke qenë se €rion Veliaj deklaroi se te Liqeni ka vend për të gjithë, urojmë që të mos ia vjedhë edhe memorialin Arditit, ashtu siç iu vodh jeta.